Einn vinsælasti rétturinn í indverskri matargerð. Bragðmikill, næringarríkur og saðsamur réttur sem slær alltaf í gegn.
Sjóðið hrísgrjón samkvæmt leiðbeiningum á pakkningum, oft í um 10-30 mínútur. Sjá nánari eldunarleiðbeiningar á hrísgrjónum.
Takið tofu-ið úr umbúðunum og vefjið því inn í viskustykki eða eldhúspappír til að draga úr vökva. Pressið létt til að losa sem mestan raka. Skerið tofu-ið í munnbitastóra bita og leggið til hliðar.
Takið hýðið utan af lauknum og hvítlauknum og skerið smátt.
Hitið olíu í potti eða djúpri pönnu. Steikið laukinn í um 2-4 mínútur við miðlungsháan hita þar til hann verður mjúkur og gylltur.
Lækkið örlítið hitann á pönnunni. Bætið hvítlauk, garam masala, túrmeriki, broddkúmeni, engifer- og chillídufti saman við laukinn, ásamt nokkrum dropum af vatni þannig að myndist eins konar kryddmauk. Hitið í 1–2 mínútur. Ef þið viljið má sleppa vatninu og þurrrista kryddin, en passið þá vel að þau brenni ekki við.
Hellið tómatpassata og kókosmjólk út í og hrærið vel. Látið suðuna koma upp og leyfið réttinum að malla í um 10 mínútur. Ef sósan er of þykk, bætið þá vatni út í. Stilla má magn vatns eftir smekk – setjið meira eða minna eftir því hvernig áferð þið viljið.
Setjið tofu-ið út í, lokið pottinum og látið malla áfram í 10–15 mínútur. Hrærið varlega svo bitarnir haldist heilir.
Bætið frosnum ertubaunum við og látið malla í 5–10 mínútur í viðbót.
Skerið límónu í báta.
Berið réttinn fram með límónubátum og hrísgrjónum. Gott er að toppa með sýrðum jurtarjóma og fersku kóríanderi fyrir enn meira bragð. Einnig er hægt að bjóða upp á meðlæti eins og skornar gúrkur, papriku eða ferska steinselju.
Tofu hentar afar vel í þennan bragðgóða rétt. Ef tími leyfir má láta það liggja lengur í sósunni svo það taki betur í sig kryddin. Indversk matargerð einkennist af ríkulegri notkun krydda og því er tilvalið að eiga Garam masala í kryddskúffunni til að geta eldað þennan rétt reglulega.
Höfundur
Arna Engilbertsdóttir
