Heimagert pítabrauð lyftir pítumáltíð í nýjar hæðir. Baksturinn tekur smá tíma en er vel þess virði.
Hitið ofninn í 250°C.
Blandið hveiti, heilhveiti, sesamfræjum, salti, sykri og þurrgeri saman í stóra skál.
Hitið vatn þar til það er volgt. Hrærið því saman við þurrefnin í skálinni með höndunum eða í hrærivél þar til deigið verður mjúkt og samfellt.
Látið deigið hefast í 20 mínútur á hlýjum stað.
Hnoðið deigið létt og mótið í bollur með höndunum. Ef notuð er grunnuppskrift þá skal miða við 8 jafn stórar bollur.
Fletjið hverja bollu út í hringlaga brauð sem er um 1/2 cm að þykkt. Látið brauðin hefast aftur á hlýjum stað í 10 mínútur.
Bakið brauðin í miðjum ofni í 3 mínútur, þau eiga að vera nokkuð ljós og mjúk.
Setjið brauðin á kökurist strax eftir bakstur. Leggið þurran klút eða viskustykki yfir og látið brauðin kólna undir klútnum.
Bakið aðeins fjögur brauð í einu svo hitinn í ofninum haldist jafn en þá eiga brauðin að blása út.
Prófið ykkur áfram með hveitihlutföllin t.d. með því að nota 6 dl hveiti og 2 dl heilhveiti ef þið viljið meira af trefjum.
Pítubrauð eru mjög skemmtileg í notkun. Fyllið þau með því sem þið eigið til t.d. baunum, linsubaunum, kjúklingi, tofu eða hakki. Bætið líka við grænmeti eins og gúrku, tómötum, papriku, kúrbít og jafnvel vínberjum eða ólífum.
Höfundur
Af bestu lyst
