Litríkt og næringarríkt haustsalat með kínóa og fersku grænmeti. Frábær réttur sem bætir trefjum inn í mataræðið.
Hitið ofninn í 200°C. Setjið bökunarpappír í ofnskúffu.
Takið hýðið af rauðlauknum og skerið hann í grófa bita. Skolið sætar kartöflur, gulrætur, kúrbít og brokkolí og skerið í hæfilega litla bita. Skerið botninn af rósakálinu, fjarlægið ystu blöðin og skerið það í tvennt.
Setjið grænmetið á ofnplötu. Dreypið olíu yfir, kryddið með örlitlu salti og pipar og blandið létt saman. Bakið í ofni í um 20 mínútur eða þar til grænmetið er fulleldað og farið að mýkjast.
Skolið kínóa í sigti undir köldu rennandi vatni. Setjið það síðan í pott með tvöfalt meira magni af vatni. Sjóðið samkvæmt leiðbeiningum á umbúðunum, yfirleitt í 15–20 mínútur, eða þar til kínóað er mjúkt og allt vatn hefur gufað upp.
Ristið graskers- og sólblómafræ á þurri pönnu við meðalhita. Hristið pönnuna reglulega eða hrærið í fræjunum svo þau brenni ekki en það getur gerst mjög fljótt.
Skerið granatepli í tvennt og takið fræin úr og setjið í skál. Passið að allt hvítt sé tekið burt þar sem það er mjög biturt á bragðið.
Setjið soðið kínóa í stóra skál og bætið bakaða grænmetinu saman við. Hellið smá ólífuolíu og balsamikediki yfir og blandið öllu létt saman.
Toppið salatið með granateplakjörnum og fræjum.
Í þetta salat er tilvalið að nota það grænmeti sem til er í ísskápnum eða frystinum til dæmis grasker, gulann lauk, hvítlauk, tómata, papriku, sveppi eða grænkál. Ef grænkál er notað er gott að skola það, rífa niður og bæta því á ofnplötuna síðustu 5–7 mínúturnar.
Höfundur
Gott og einfalt
