Mildur indverskur grænmetispottur með kartöflum og blómkáli – fullkominn heimilismatur og einnig góður sem meðlæti.
Skolið og skerið kartöflur og blómkál í litla bita.
Sjóðið vatn í katli eða potti. Setjið kartöflurnar í annan pott og hellið sjóðandi vatninu yfir þannig að það flæði yfir þær. Setjið pottinn á helluna og sjóðið kartöflurnar í 5–7 mínútur.
Bætið síðan blómkáli út í pottinn, ásamt meira vatni ef þarf. Látið malla í 2–3 mínútur til viðbótar eða þar til grænmetið er orðið mjúkt en ekki ofeldað. Sigtið vatnið frá og setjið grænmetið til hliðar í skál.
Takið utan af lauk og hvítlauk og saxið smátt.
Hitið olíu í potti og steikið laukinn á vægum hita í 3–5 mínútur eða þar til hann verður glær og mjúkur. Bætið hvítlauknum, tómatpassata, vatni, kóríanderdufti, broddkúmen, engiferdufti, túrmeriki, garam masala og chillíflögum út í pottinn. Hrærið vel saman.
Bætið elduðum kartöflum, blómkáli og ertum út í pottinn. Setjið lok á og látið malla við væga suðu í um 15 mínútur. Hrærið af og til og fylgist með að kartöflurnar og blómkálið mýkist án þess að ofeldast.
Ef grænmetið er ekki orðið fulleldað og ef lítill vökvi er í botninum bætið þá örlítið af vatni út í og eldið aðeins lengur.
Skolið ferskt kóríander og skerið niður.
Berið fram með ferskum kryddjurtum og sýrðum hafrarjóma, jógúrt eða raita til að milda kryddin og skapa gott jafnvægi.
Höfundur
Arna Engilbertsdóttir
