Uppskrift af einföldum og góðum heilkorna bökubotni sem er hægt að setja allsskonar fyllingar í.
Hitið ofninn í 200°C , hafið hitann lægri eða 180°C ef notaður er blástur.
Setjið haframjöl í matvinnsluvél og malið þar til það verður að fíngerðu mjöli.
Brjótið eggin og setjið í skál. Bætið eggjum, olíu og hveiti í matvinnsluvélina með haframjölinu og vinnið þar til deig myndast.
Takið deigið úr matvinnsluvélinni hnoðið í bolta og setjið í miðjuna á örk af bökunarpappír.
Fletjið deigið út í hring sem er aðeins stærri en 26 cm bökuform eða annað hringlaga form sem þið eigið.
Þegar deigið er útflatt setjið það í formið. Ýtið fyrst varlega í miðjuna svo það nái niður í botninn, sléttið svo úr því og þrýstið deiginu upp í kantana. Skerið af efst ef eitthvað stendur upp úr.
Stingið göt víðs vegar í botninn með gaffli.
Forbakið botninn í um það bil 10 mínútur. Bætið síðan við fyllingu að eigin vali og bakið áfram þar til hún hefur stífnað.
Bökur eru tilvaldar til að nýta það sem til er í ísskápnum! Notið til dæmis sætar kartöflur, fetaost, spínat, grænkál, rauðrófur, papriku, tómata eða annað sniðugt hráefni sem þið eigið. Hér eru tvær hugmyndir að góðum fyllingum sem hægt er að prófa - annars vegar baka með brúnuðum lauk og hægelduðum tómötum og hins vegar baka með spínati og kúrbít.
Höfundur
Gott og einfalt
