Grænmetislasagna með mildri ostasósu, einfaldri tómatsósu og bökuðu rótargrænmeti – næringarríkt og bragðgott.
Hitið ofninn í 200°C. Setjið smjörpappír á ofnplötu.
Skolið brokkolí og skerið í minni bita. Hreinsið sveppina með rökum pappír eða hreinu viskustykki og skerið í þunnar sneiðar. Skrælið gulrætur og gulrófu og skerið í litla bita eða strimla.
Raðið grænmetinu á ofnplötuna. Setjið smá olíu og salt yfir grænmetið. Bakið í um 15-20 mínútur eða þar til grænmetið er eldað í gegn.
Takið utan af hvítlauknum og saxið hann smátt.
Setjið hvítlauk, hakkaða tómata, tómatpúrru og kryddblöndu í skál og hrærið vel saman.
Rífið ost niður með rifjárni.
Blandið saman í skál rifnum osti, kotasælu, grískri jógúrt og sinnepi. Haldið eftir smá osti til að strá yfir réttinn í lokin.
Bætið múskati út í blönduna. Smakkið til með örlitlu salti og pipar ef þið viljið.
Penslið smávegis af olíu í botninn á ofnföstu formi og leggið helminginn af lasagnaplötunum í botninn.
Setjið ofnbakað grænmeti, tómatsósu og ostasósu lagskipt í formið. Haldið eftir smá af ostasósunni til að setja ofan á lasagnaplöturnar í lokin.
Endið á því að leggja restina af lasagnaplötunum efst og smyrjið ostasósunni yfir þær. Stráið síðan rifnum osti ofan á.
Lækkið ofnhitann í 180°C og bakið lasagnað í um 35-40 mín.
Til að auka næringargildi réttarins má bæta við soðnum linsubaunum, til dæmis úr dós. Einnig má pressa smá sítrónusafa og rífa örlítið af sítrónuberki út í ostasósuna til að gefa réttinum léttan sítruskeim.
Tilvalið er að nýta það grænmeti sem til er í ísskápnum hverju sinni í réttinn. Til dæmis má bæta við lauk, skipta sveppum út fyrir kúrbít eða nota spínat í stað brokkolís.
Gott er að leyfa lasagnanu að standa í 10–15 mínútur áður en það er borið fram. Meðlæti eins og ferskt salat og/eða gróft brauð fer einstaklega vel með réttinum.
Höfundur
Sigríður Björk Bragadóttir
