Fljótleg, bragðgóð og næringarrík fiskimáltíð með grænmeti og osti – fullkomin bæði hversdags og um helgar.
Finnið til pott og sjóðið hrísgrjón samkvæmt leiðbeiningum á pakkningum, oft í um 10-30 mínútur. Sjá nánari eldunarleiðbeiningar á hrísgrjónum hér.
Hitið ofninn í 180°C.
Skerið fiskinn í passlega bita fyrir hvern og einn (ef eldað er fyrir tvo þá í tvo bita).
Skolið tómata og papriku og skerið í þunnar sneiðar. Skolið basilíkuna og rífið laufin af stilkunum. Skerið mozzarellaostinn í sneiðar.
Setjið fiskinn í eldfast mót og búið til eins konar bréfvasa úr bökunarpappír fyrir hvert stykki. Raðið mozzarellaosti, tómötum, papriku og basilíkulaufum lagskipt ofan á fiskinn.
Saltið fiskinn og piprið og hellið olíu yfir í lokin.
Bakið fiskinn í ofni í um 12 til 15 mínútur eða þar til hann er eldaður í gegn og osturinn bráðnaður.
Berið fiskinn fram með hýðishrísgrjónum og fersku niðurskornu grænmeti eða góðu salati. Gott er að kreysta smá sítrónu yfir fiskinn til að fríska upp bragðið.
Höfundur
Sigríður Björk Bragadóttir
