Steinbítur með kasjúhnetum, apríkósum, hvítlauk og bræddum osti er dásamleg blanda af mildum fiski og ríkulegu bragði.
Hitið ofninn í 190°C.
Ef tími leyfir er gott að leggja apríkósurnar í bleyti í vatni í um 30 mínúturm þá verða þær mýkri og safaríkari. Það er líka allt í lagi að sleppa þeim úr uppskriftinni.
Saxið apríkósur, kasjúhnetur og steinselju í hæfilega smáa bita – munið að skola steinseljuna fyrst. Takið utan af hvítlauknum og pressið hann. Rífið ostinn með rifjárni.
Hrærið saman í skál apríkósum, kasjúhnetum, steinselju, hvítlauk, osti og kryddblöndu. Setjið blönduna yfir fiskinn þegar hann er kominn í eldfast mót.
Skolið sítrónur og skerið í sneiðar og raðið í botninn á eldföstu móti.
Skerið steinbítinn í hæfilega bita og leggið ofan á sítrónusneiðarnar.
Kryddið fiskinn með salti og pipar og dreypið örlítið af olíu yfir (ef vill). Dreifið apríkósublöndunni með ostinum jafnt yfir.
Bakið fiskinn í ofni í um 20 mínútur eða þar til osturinn er orðinn gylltur og fiskurinn fulleldaður.
Gott er að bera réttinn fram með fersku salati, soðnu byggi eða ofnbökuðum sætum kartöflum með smá parmesan- eða fetaosti.
Höfundur
Jana Steingrímsdóttir
