Stökkur og safaríkur steiktur fiskur með léttu remúlaði og fersku grænmeti. Fljótleg og bragðgóð máltíð fyrir alla fjölskylduna!
Einföld og holl leið til að bæta trefjum í daglega fæðu ásamt góðum fiskskammti, sem inniheldur B12-vítamín og joð.
Roðflettið fiskinn ef þörf er á. Skerið hann í bita, miðað við einn til tvo bita á mann.
Brjótið egg í skál og bætið við mjólk og salti. Pískið vel saman með gaffli.
Setjið grófan brauðrasp og paprikuduft í skál og blandið saman. Ef þið eigið ekki tilbúinn grófan rasp má búa hann til úr þurru grófu brauði í matvinnsluvél. Ristið brauðið fyrst ef það er ekki alveg þurrt.
Veltið hverju fiskstykki fyrst upp úr eggjablöndu og síðan upp úr raspi. Notið gaffal eða fingurnar í verkið.
Hitið olíu á pönnu. Steikið fiskinn í olíunni á báðum hliðum þar til hann er gullinbrúnn og eldaður í gegn.
Skolið brokkolí og gulrætur og skerið í passlega bita.
Hitið vatn í botni á potti. Gufusjóð grænmetið í um 5-7 mínútur í gufusuðugrind, hafið pottlokið á allan tímann. Einnig má ofnbaka grænmetið í eldföstu móti í um 15-25 mínútur við 190°C.
Saxið súrar gúrkur smátt niður.
Skolið sítrónu, rífið börkinn með rifjárni og kreistið safann úr henni.
Hærið vel saman í skál sýrðum rjóma, súrum gúrkum, sítrónuberki og sítrónusafa, karrí og sinnepi ásamt smá salti og pipar.
Berið fiskinn fram með remúlaði og soðnu grænmeti. Gott er að kreista smá sítrónusafa yfir fiskinn rétt áður en hann er borinn fram. Einnig er ferskt salat frábært meðlæti með réttinum.
Höfundur
Gott og einfalt
