Litríkur og ferskur rækjukokteill sem hentar fullkomlega sem léttur forréttur um hátíðirnar. Mangó, avókadó og kraftmikil sósa gera hann bæði fallegan og ómótstæðilegan.
Uppgefinn eldunartími tekur ekki til þess tíma sem þarf til að þíða rækjurnar. Gott er t.a.m. að leyfa þeim að þiðna yfir nótt inni í ísskáp.
Látið rækjurnar þiðna alveg í kæli eða í köldu vatni. Gott er að miða við að þýða rækjurnar deginum áður inni í ísskáp með því að hafa þær í sigti í hæfilega stórri skál.
Þegar rækjurnar hafa þiðnað, skolið þær þá í sigtinu undir köldu vatni og þerrið síðan varlega með eldhúspappír.
Takið hýðið utan af mangói, skerið ávöxtinn frá steininum og skerið í litla bita.
Skerið avókadó í tvennt og fjarlægið steininn varlega með skeið eða hníf. Skafið avókadóið úr hýðinu og skerið í litla bita. Sjá nánari upplýsingar um meðhöndlun á avókadó.
Flysjið rauðlauk og hvítlauk og saxið smátt. Einnig má pressa hvítlaukinn. Skolið kóríander, saxið smátt og leggið til hliðar.
Skerið sítrónu í tvennt, takið alla steina frá. Setjið rækjurnar í stóra skál og kreistið safa yfir þær ásamt helmingnum af saltinu og piparnum og hrærið létt saman með skeið eða gaffli.
Bætið mangói, avókadói og rauðlauk varlega saman við rækjurnar.
Setjið sýrðan rjóma og majónes saman í skál. Bætið srirachasósu út í eftir smekk, byrjið á litlu magni þar sem sósan getur verið sterk. Setjið restina af salti og pipar í skálina og hrærið vel saman.
Finnið til falleg glös eða skálar til að bera rækjukokteilinn fram í.
Skolið kál og setjið eitt salatblað í botninn á hverju glasi.
Raðið rækjublöndunni jafnt ofan á salatblöðin og toppið réttinn með chillímajó og kóríander.
Hægt er að nota graslauk eða steinselju sem ferskar kryddjurtir en einnig má sleppa fersku kryddjurtunum og nota örlítið þurrkað krydd í staðinn eins og dill, steinselju, estragon eða sítrónupipar.
Höfundur
Berglind Hreiðarsdóttir
