Bragðmikið og næringarríkt salat með ferskum ávöxtum, stökkum hnetum og krydduðum kjúklingi. Fullkomið sem létt máltíð eða kvöldverður!
Hitið ofninn í 200°C.
Skerið kjúklingabringur í tvær flatar steikur, reynið að hafa þær jafnþykkar svo steikingin heppnist vel.
Blandið saman í skál olíu og kryddblöndu að eigin vali. Veltið kjúklingabitunum upp úr kryddolíunni og saltið og piprið eftir smekk.
Setjið kjúklinginn í eldfast mót eða á ofnskúffu klædda bökunarpappír. Bakið í 10 mín eða þar til kjötið er eldað í gegn.
Skolið klettasalat. Skolið papriku og vínber og skerið í hæfilega stóra bita. Skerið ólífur í tvennt. Takið hýðið utan af avókadó og mangó og skerið í bita. Sjá nánari upplýsingar um meðhöndlun á avókadó.
Saxið pekanhneturnar í litla bita. Ristið þær ásamt sólblóma- og graskersfræjum á þurri pönnu við miðlungshita í 2–3 mínútur.
Skerið granateplið í tvennt og haldið því yfir skál með sárið niður. Berjið á börkinn með sleif eða skeið þar til fræin losna og falla í skálina. Passið að hvítar himnur fylgi ekki með.
Skerið eldaða kjúklinginn í smærri bita. Setjið bitana í stóra skál ásamt öllu sem þið hafið undirbúið og blandið vel saman.
Blandið saman í skál olíu og balsamikediki, saltið smá og piprið og hrærið vel saman. Berið sósuna fram með salatinu.
Í þetta salat má nota kjúklingabringur, lundir eða úrbeinuð kjúklingalæri – allt eftir því hvað er við höndina eða hentar best. Kjötið má steikja eða ofnbaka, í heilu lagi eða skorið í bita. Í stað kjúklings má nota tófú eða baunir.
Tilvalið er að skera niður gúrku, blómkál, brokkolí eða annað grænmeti sem til er á heimilinu og bæta við salatið. Einnig er gott að ofnbaka sætkartöfluteninga og bera fram með. Parmesan- eða fetaostur fer vel með salatinu, eftir því sem hverjum og einum þykir best.
Höfundur
Sigríður Björk Bragadóttir
