Lambakjöt er vinsæll hátíðarmatur á páskum. Hér er lambasteikin krydduð með rósmaríni og borin fram með léttu og litríku bulgursalati með fersku grænmeti sem passar vel með kjötinu.
Hitið ofninn í 175°C.
Takið lambasteikina úr kæli um 20 mínútum áður en hún er elduð svo eldunin verði jafnari.
Takið hýðið utan af hvítlauksrifinu og saxið smátt eða rífið niður. Setjið rósmarín, hvítlauk, salt, pipar og örlítið af olíu í skál (notið 1/3 af olíunni) og blandið saman með skeið. Haldið eftir smá af salti og pipar fyrir búlgursalatið. Nuddið kryddblöndunni á kjötið.
Hitið olíu (notið 1/3 af olíunni) á steikarpönnu við meðalháan hita. Brúnið kjötið á öllum hliðum.
Setjið kjötið í eldfast mót og steikið í miðjum ofni þar til kjarnhiti nær 68–70°C. Ef þið eigið ekki kjöthitamæli má miða við að steikja kjötið í ofni í um 20–25 mínútur, en fer þó eftir þykkt bita. Látið kjötið hvíla í um 5-10 mínútur áður en þið skerið það svo safinn haldist betur í kjötinu.
Sjóðið bulgur í potti samkvæmt leiðbeiningum á pakkningu.
Skolið paprikur og steinselju. Fræhreinsið paprikurnar og skerið þær smátt. Saxið steinseljuna. Afhýðið rauðlauk og skerið hann smátt.
Hitið afganginn af olíunni á pönnu og steikið papriku og rauðlauk í nokkrar mínútur þar til grænmetið mýkist.
Setjið soðið bulgur í hentuga skál til að bera fram í og blandið steikta grænmetinu og steinseljunni saman við.
Kreistið sítrónusafa yfir. Hrærið vel saman og smakkið til með smá salti, pipar og sítrónusafa.
Setjið jógúrt og chillísósu að eigin vali í skál og hrærið saman með skeið.
Berið lambasteikina fram með bulgursalati og jógúrtsósu. Gott er að hafa matarmikið grænt salat sem meðlæti og jafnvel steiktar grænar belgbaunir. Frosnar belgbaunir eru ódýrastar.
Hægt er að bæta gúrku eða kirsuberjatómötum í bulgursalatið til að auka ferskleika. Edamame baunir passa vel við ef þið viljið gera salatið matarmeira. Einnig má strá ristuðum kasjúhnetum, furuhnetum eða möndlum yfir til að fá meiri áferð.
Í jógúrtsósuna má bæta smá sítrónusafa eða rifnum sítrónuberki. Einnig má krydda hana með örlitlu salti, hvítlauk eða ferskum kryddjurtum eins og myntu eða steinselju. Þá er einnig gott að nota þurrkaðar kryddjurtablöndur í sósuna, til dæmis herbs de Provence eða oreganó.
Höfundur
Hjärt-Lungfonden
