Frábært nesti eða millimál – tilvalið í skólann, vinnuna, eða ferðalagið.
Hellið kjúklingabaunum í sigti og skolið vel undir köldu vatni. Hristið sigtið létt til að losna við umfram vatn.
Setjið baunirnar í matvinnsluvél. Ef þið eigið ekki matvinnsluvél, notið töfrasprota eða öflugan blandara. Takið utan af hvítlauk og bætið honum við. Maukið þar til blandan verður jöfn og mjúk.
Skolið chili og saxið smátt. Bætið chili út í kjúklingabaunamaukið ásamt jógúrti, fetaosti, pestó (eða sólþurrkuðum tómötum) og paprikudufti. Maukið áfram þar til blandan verður jöfn og vel blönduð.
Kreistið sítrónu og bætið safanum út í maukið ásamt salti og pipar eftir smekk. Smakkið til og stillið bragð og áferð með kryddum, vatni eða meiri sítrónusafa eftir þörfum.
Bætið smá hnetusmjöri út í maukið fyrir rjómakenndari áferð. Einnig er gott að bæta við ferskum kryddjurtum eins og kóríander eða steinselju, sérstaklega ef þær eru til í eldhúsinu þá stundina.
Dásamlegt er að bera maukið fram með niðurskornu grænmeti eins og gulrótum, agúrku og papriku, heilkorna brauði eða frækexi.
Höfundur
Af bestu lyst
