Franska lauksúpan á sér langa sögu. Uppruni hennar er sennilega frá tímum Rómverja. Frakkar þróuðu síðan uppskriftina og bættu brauði og glóðuðum osti ofan á og varð súpan vinsæll matur þar í landi.
Afhýðið laukinn og skerið hann í tvennt og svo hvern helming í tvo hluta. Sneiðið laukinn niður.
Takið utan af hvítlauk og saxið smátt.
Setjið olíu í pott og hitið. Steikið lauk og hvítlauk við vægan hita í um 15 mínútur eða þar til laukurinn er glær og/eða aðeins farinn að brúnast.
Piprið vel í pottinn og látið piparinn steikjast aðeins með.
Bætið timían næst út í pottinn.
Stráið heilhveitinu yfir laukinn og hrærið honum saman við með sleif. Hellið nautasoði og mysu út í súpuna, fyrst smávegis í einu og síðan öllu til að hveitið fari ekki í kekki.
Sjóðið súpuna í 30 mínútur við meðalhita, smakkið til með pipar og sjávarsalti.
Súrdeigsbrauð eða heilkornabrauð og kröftugur ostur ofan á (t.d. Ísbúi) gerir þessa súpu vel hæfa í matarboðið. Hitið þá ofninn á 200°C eða stillið á grill. Setjið bökunarpappír á ofnplötu. Skerið brauðið niður í stóra teninga. Setjið teningana, í passlegum skömmtum á mann á pappírinn, stráið rifnum osti yfir teningana. Bakið eða grillið brauðið þar til það er gullið og girnileg.
Hellið súpunni í skálar og setjið grillað ostabrauð í hverja súpuskál ef þið hafið útbúið það. Berið fram strax.
Höfundur
Sigríður Björk Bragadóttir
