Mjúkt og gott döðlugott með súkkulaðibragði. Auðvelt að útbúa og gott að eiga í kæli þegar ykkur langar í eitthvað sætt. Sætur og góður biti sem inniheldur líka hátt hlutfall af trefjum.
Grunnuppskrift miðast við 12 stykki.
Bleytið bökunarpappír með örlitlu vatni og kuðlið hann vel saman svo hann mýkist og auðveldara verði að móta hann að forminu. Sléttið úr pappírnum og leggið hann í brauðform. Einnig má nota hringlaga form, um 20 cm í þvermál, en þá verða bitarnir ekki allir jafn reglulegir í laginu.
Fjarlægið steinana úr döðlunum ef þeir eru til staðar. Setjið döðlurnar í lítinn pott.
Bætið kókosolíu, vatni og hnetusmjöri saman við og hitið við vægan hita í um 5 mínútur. Hrærið reglulega og stappið döðlurnar með gaffli þar til blandan er mjúk og klístruð líkt og karamella.
Takið pottinn af hitanum og hrærið kakói, vanillu og salti saman við.
Bætið chiafræjum út í og blandið vel saman. Látið standa í 3–5 mínútur. Ef blandan er mjög þurr má bæta vatni við, einni teskeið í einu, þar til hún er hæfilega mjúk.
Hrærið púffuðu kínóa varlega saman við með sleif svo það haldi stökkleikanum.
Setjið blönduna í formið og þrýstið henni þétt og jafnt niður með sleif eða skeið.
Brjótið súkkulaðið í bita og setjið í hitaþolna skál. Setjið skálina yfir pott með heitu vatni og gætið þess að botn skálarinnar snerti ekki vatnið. Hrærið þar til súkkulaðið er bráðið og dreifið því jafnt yfir döðlublönduna.
Setjið í kæli í 30-60 mínútur eða að minnsta kosti þar til súkkulaðið hefur harðnað.
Lyftið döðlugottinu úr forminu með bökunarpappírnum og skerið í jafna bita.
Púffað kínóa er kínóa sem hefur verið hitað þannig að fræin þenjast út og verða létt og stökk. Áferðin minnir á morgunkorn úr púffuðum hrísgrjónum. Púffað kínóa fæst til að mynda í mörgum matvöruverslunum. Í staðinn má þó nota Rice Krispies, sykurminna granóla eða grófmulið hrísgrjóna poppkex.
Ef dökkt súkkulaði er ekki við höndina má sleppa því eða setja kókosolíu, kakó og hlynsíróp eða hunang í pott og búa til súkkulaðiblöndu þannig.
Prófa má að bæta ristuðum höfrum, granóla, söxuðum hnetum, goji-berjum eða þurristuðum kókosflögum í döðlugrunninn. Einnig getur veri gott að strá kókosflögum, kakónibbum eða söxuðum hnetum yfir súkkulaðið áður en það stífnar.
Höfundur
Gott og einfalt
