Gómsætur og bragðmikill kjúklingaréttur sem fellur í kramið hjá allri fjölskyldunni – einfaldur í eldun og fullkominn fyrir góða samverustund við matarborðið!
Ef notaður er frosinn kjúklingur er gott að þíða hann í umbúðum yfir nótt inni í ísskáp eða í umbúðum í köldu vatni ef tími er lítill.
Forhitið ofninn í 200°C.
Skerið kjúkling í litla bita. Hitið helminginn af olíunni á pönnu og steikið kjúklinginn við miðlungsháan hita. Saltið örlítið þegar hann hefur brúnast vel. Setjið í skál og leggið til hliðar.
Skolið kartöflur og papriku. Takið utan af lauk og hvítlauk. Skerið kartöflur og lauk í þunnar sneiðar, saxið hvítlauk og skerið papriku í litla bita.
Setjið restina af olíunni á pönnuna steikið laukinn fyrst í 5 mínútur. Bætið síðan við hvítlauk og karríi og steikið í eina mínútu til viðbótar.
Bætið næst við kjúklingakrafti, vatni, kókosmjólk, ostrusósu, hnetusmjöri og smá salti. Hrærið vel.
Að lokum er kjúklingi, kartöflum, papriku og lárviðarlaufum bætt við og öllu hrært saman.
Setjið réttinn inn í ofn í eldföstu móti með álpappír yfir í um 30-40 mínútur eða þar til kartöflurnar eru vel eldaðar.
Takið síðast álpappírinn af og eldið í um 10 mínútur til viðbótar.
Auðvelt er að leika sér með þennan rétt og bæta við grænmeti eins og gulrótum, brokkolíi eða blómkáli – eða því sem til er í kæli. Baunir, ferskar eða úr dós, gefa réttinum ferskleika og bæta við trefjum og próteini.
Upplagt að bera réttinn fram með brúnum hrísgrjónum og fersku salati, eins og spínati eða klettasalati.
Höfundur
Gott og einfalt
