Shakshuka – krydduð arabísk eggjapanna þar sem eggin eldast í bragðmikilli tómatsósu með grænmeti. Létt og ljúffeng máltíð, hvort sem er í morgun- eða hádegismat.
Skolið papriku og takið utan af lauknum. Skerið paprikuna og laukinn í litla bita eða þunnar sneiðar.
Hitið olíu á pönnu og steikið paprikuna og laukinn á meðalhita þar til grænmetið verður mjúkt.
Takið utan af hvítlauk og pressið eða saxið smátt og bætið út á pönnuna. Steikið í um 1 mínútu til viðbótar.
Bætið broddkúmeni, chilidufti, salti, pipar og hökkuðum tómötum út á pönnuna. Látið sjóða við meðalhita í um 10 mínútur, helst með loki, þar til sósan þykknar og bragðið þróast.
Gerið litlar dældir í sósuna á pönnunni, eina fyrir hvert egg. Brjótið eggin og setjið þau varlega í dældirnar, eitt í einu.
Setjið lokið aftur yfir og látið eggin eldast við meðalhita í um 4 til 5 mínútur.
Gott er að bera salat og heilkornabrauð fram með réttinum.
Höfundur
Sigríður Björk Bragadóttir
