Fljótleg og næringarrík eggjakaka sem hentar allan daginn – heit eða köld.
Þvoið kartöflur vel og skerið í þunnar sneiðar. Takið utan af lauk og saxið smátt. Skolið kúrbít og skerið í litla teninga eða rífið niður með rifjárni.
Hitið olíu á pönnu og steikið kartöflur, lauk og kúrbít við meðalháan hita í 7–8 mínútur.
Skolið chillípipar, fjarlægið fræ og saxið smátt. Bætið á pönnuna og steikið áfram í 5 mínútur.
Brjótið eggin í skál og bætið kotasælu við. Hrærið létt saman með gaffli eða handþeytara. Kryddið með salti og pipar. Hellið blöndunni yfir grænmetið á pönnunni, lækkið hitann og látið stífna við mjög vægan hita í 10–15 mínútur með loki.
Rífið niður parmesan og stráið yfir í lokin. Setjið undir grill í ofni í örfáar mínútur ef þið viljið ostinn bakaðan og gylltan.
Berið réttinn fram með tómatabrauði. Merjið hvítlauksrif í smá ólífuolíu og penslið heilkorna brauðsneiðar með olíunni. Skerið tómata í sneiðar og leggið ofan á. Grillið í heitum ofni þar til brauðið er stökkt.
Til að auka næringargildi má bæta við rifnum gulrótum, söxuðum sveppum eða spínati. Smá hvítlauksduft eða fersk steinselja gefa einnig dýpra bragð.
Höfundur
Af bestu lyst
